ده باختصار كارت اسمه ( isic ) او كارت الطالب الدولي :) سمعت عنه من حوالي اسبوع وحقيقة قلت ادور واشوف حكايته ايه وبصراحه صدمت أما عرفت حكايته وإنه موجود من زمااااان جدا _______ ده باختصار كارت اى طالب في أى مرحله دراسيه ممكن يعمله ( طالب في مدرسه - طالب ف

ده باختصار كارت اسمه ( isic )
او كارت الطالب الدولي 🙂
سمعت عنه من حوالي اسبوع وحقيقة قلت ادور واشوف حكايته ايه وبصراحه صدمت أما عرفت حكايته وإنه موجود من زمااااان جدا
_______
ده باختصار كارت اى طالب في أى مرحله دراسيه ممكن يعمله ( طالب في مدرسه – طالب في جامعه – طالب دراسات عليا )
مالوش سن أقصى … المهم تكون اكبر من ١٢ سنه
___
الكارت ده لو حضرتك سافرت أي دوله في العالم بتخش على الموقع بتاعهم أو الأبلكيشن بتاعهم وتحط بس اسم البلد اللي انت رايحها وهو بقى بيطلعلك كل الخصومات اللي تقدر تحصل عليها بالكارت ده على كل المتاحف بقى او المواصلات او مطاعم او مزارات أو غيره
وبتكون بالمناسبه خصومات محترمه جدا 🙂
___
تعمله ازاي وفين ؟؟
أولا : تاخد معاك الأتي :
١- الباسبور بتاعك
٢- شهادة قيد من الكلية أو المدرسه أو كارنيه الكلية أو اى حاجه تثبت انك بتدرس
٣- ١٠٠ جنيه

ثانيا : تروح فين
تطلع علي المكتب بتاعهم واللي موجود في ٢٣ شارع المنيل
تركب مترو وتنزل محطة الملك الصالح وتطلع من اتجاه المنيل وتسأل على شارع المنيل وبالظبط ٥ دقايق مشى هتكون هناك
هو مكتب في الدور الأول هتلاقي عليه يافطه بعنوان ( المركز المصرى لخدمات سفر الطلبة ) في عماره قدام بنك وهناك تلاقي شاب محترم جدا اسمه أحمد هيتعاون معاك على طول وهيسلمك الكارنيه في خمس دقايق بالظبط 🙂
_______
تقدر قبل ما تروح تستفسر منهم على الرقم ده 0225310330
بالمناسبة انا فقط لا غير لقيت حاجه حلوه ممكن ناس كتير ما تعرفهاش فقلت انقلها لغيري فقط لا غير … ممكن ناس تشوفها حلوه وناس تشوفها وحشه … انت ليك حق المعرفه وبعدين تعمل بقى اللي انت عايزه 🙂